商業二台叱咤 903「你好嘢」《有你最whole》訪問足本重溫 – 上半部

| Employee Engagement(員工敬業度)是什麼?

其實員工敬業度呢,英文我諗大家可能比較聽得多啲近年,咁就係Employee Engagement 啦。咁其實係講緊啲咩呢? 其實係希望令到,員工同埋公司有一個情感上有個連繫。咁呢個連繫係會令佢好想呢個地方變好,佢喺呢個地方,唔會睇到啲嘢就袖手旁觀,然後會覺得所有嘢都關我事。然後透過佢積極向上,佢會產生一個好大嘅生產力。最後會令到公司係整體都會變好嘅。 咁相信老闆聽到呢度應該都會好想做好Employee Engagement.

| 提倡Employee Engagement(員工敬業度)怎樣令到員工有情感上的投資,不再單純與金錢掛勾?

其實真心講,香港有好多公司嘅老闆係好願意做好多嘢去比員工。但其實公平少少係老闆角度睇下,佢就會覺得其實我做咗咁多嘢,你都冇話過俾我聽你收到。其實你都冇appreciate 呢樣嘢;你都冇乜反應。但當然我哋中間,作為一個媒人咁樣,喺中間睇嘅時候,就會話: 咁老闆查實你做咁多嘢,你都冇同過個員工講。即係你做咗好多嘢,咁員工其實又收唔到,咁你自己喺度篤手指,死啦我啲員工呢又收唔到,咁係咪不如我就唔做啦。 所以我哋會講,我哋做Employee Engagement,我哋做員工敬業度管理,其實我哋做緊嘅行為,唔係啲咩好新鮮嘅事嚟嘅。我哋都係頭先講,可能做個周年晚宴,我哋做嗰啲團隊培訓,可能做區域會議,做啲獎勵旅遊。

大家其實都覺得呢啲嘢不嬲都發生緊嘅。不過問題係,呢啲嘢係做嘅過程入邊,以前冇好好用一個新嘅角度出發去睇。而好老實係老闆嘅角度,好多時呢啲同員工有關嘅活動,都係公司一啲後勤嘅部門做嘅,咁就好容易被當左做一個Cost Center,你淨係識得燒錢。我就嘗試去將佢賦予一個新嘅意義,就係話可唔可以將一個開支變成一個投資呢?係有回報嘅,擺啲錢係同事身上,其實如果佢收到,佢感受到,好似你所講,你對我好我更加出心幫你。好美好呀!其實係一個正向,老細又收到你出心幫我,我又會再對你好啲,跟住大家一齊做好件事,變成一個情感上嘅投資。

| 如何在港提倡Employee Engagement(員工敬業度)?

我哋一路合作嘅客戶通常有三類型嘅人。

第一類係referral過嚟,所以就會比較容易明白,同埋一定睇到有效果,然後佢先來。

第二類就係通常佢就係做嘢嘅同事,佢就接收到指令,老細會話員工都係好重要嘅stakeholders ,你諗諗。然後佢就唔知點算好,佢哋就搵到我哋,所以佢地都會開放去聽嘅。

主持:如果佢都自動自覺嚟搵你,即係佢首先就覺得,咁樣係問題嚟㗎喎!例如我個員工唔敬業,係問題嚟㗎喎?

唔一定係去到咁嘅,可能係,近年有另外一樣嘢比較興起去講,係關於可持續發展。咁講可持續發展,就有好多人要照顧嘅,就唔好唔記得咗員工。自己未必係覺得,我地有問題,我哋要處理,未必係咁。單純係話,我哋公司一路發展落去,我哋都要照顧員工,咁要點做啊?咁負責做嘢嘅人就收到一個咁樣嘅指令,咁當然,佢就唔知發生咩事啦,佢都唔知道點處理啦,咁就過嚟搵我哋啦。通常佢哋都會比較開放,當然佢哋都充滿着各種嘅擔憂。拿我哋公司就咁嘅,咁樣就唔得個喎!但係唔緊要,起碼佢哋嘗試會開放去聽,咁呢個係第二類嘅客戶啦!

第三類呢就,佢哋嚟到搵我哋,佢哋就真係當我哋做活動嘅。我而家要做一個旅遊,我依家要去泰國開一個會議,我而家就要做一個周年晚宴,我而家呢就做一場team building ,咁佢就好單一地只係想做一件事嘅啫,咁佢哋就搵我哋啦。

市面上其實大部份嘅公司,上得三位數,講緊起碼幾百人,去做一個員工周年晚宴,或者有得百零人會去一個獎勵旅遊或區域會議,其實真係好多嘢要負責。一般來講,其實公司正常的後勤部門真係做唔晒所有嘢,所以其實佢哋大部份時候都會外判。只不過係今年會搵A公司,出年就搵B公司,咁就搵到黎我哋到。就會話,我哋呢今年又要做一年一度嘅周年晚宴啦。佢哋就會嚟brief我地,咁今年就咁咁咁,就同我訂個場,就諗住幾多百人喺邊邊邊,咁你就寫個計劃書嚟啦。咁我哋就通常會問佢哋好多問題嘅,甚至乎其實我哋一般習慣,交計劃書之前,我哋都會盡量希望約到一個會。

我哋一般會有四步曲嘅。第一步就係完全透徹了解佢嘅。所以一般,我哋真係會同佢傾,我哋閑閑哋都傾個零鐘,問到真係好仔細。可能係佢哋一般嘅日常工作係點呀,日常嘅關係係點啊,一般大概內部係點。我會問好多問題嘅。咁然後透過同我地理解晒之後呢,我哋喺第二部呢,我哋就會係諗proposal嘅過程入面,開始將員工敬業度嘅諗法就滲入去啦。咁去到第三步就當然去執行呢件事啦。然後第四步好多時候HR,或者負責做呢啲活動嘅同事,都會有一啲報告去做返survey,咁我哋都會去睇返成個嘅result係點。

| Rosy Sky 如何令企業管理層願意執行Employee Engagement(員工敬業度)概念?

通常係,已經知道你係做呢樣野㗎,我哋想提升員工敬業度,所以我哋會咁樣做。咁我想問下,可能你頭先講嘅第三類,嗰啲嘅客戶你哋要同佢哋講,喺香港呢個地方,係咪比較困難一啲呢?通常如果真係遇着呢一類嘅客人,我哋就相對用返啲務實啲嘅方式同佢地做嘢嘅。與其我哋同佢講好多理念,概念,好似教書咁,其實佢地唔容易接收,因為佢哋都要慢慢去理解呢件事。所以我調返轉,用返一種務實啲嘅方式去同佢地work。例如,我哋設計嗰個主題,除咗設計完之外,我地都會解釋比佢地聽我地背後的諗法,等佢再向樓上present嘅時候容易啲。

我哋會嘗試去做佢地最大嘅後盾,去支援佢,等佢再present嘅時候,又會容易啲咁。就會再返嚟,今次老闆讚呢條橋喎。就會開始Work入面細節嘅時候,我哋所有嘅嘢都會係咁樣去互相溝通。係個過程入面,我哋係要同客戶建立一個緊密嘅聯繫,同埋大量的信任。

|「僕人式領導」是否因社會氣候轉變而興起?

係我哋嘅一啲過往case當中,都有留意到,普遍嘅氣候公司望落去係員工同老細都係處對立面。但係我哋認為唔係咁嚴重嘅。個問題喺個溝通到,溝通如果永遠都只係層遞落嚟,命令式呢,咁冇可能個關係會好。所以外國有一個有套講法叫做 – 僕人式領導。關於權力同埋資源下方,因為通常資源就主要集中係好小撮嘅部份人度。咁其他人就冇資源地,辛勤地工作。只可以去聽命令,之後佢就做。其實佢哋好有諗法,對於我哋新一代Millennial同埋Gen Y,係好需要機會去展示,但通常冇機會嘅時候,佢哋就好壓抑。然後仲要係咁嗌我去Annual dinner,去埋啲都唔關佢哋事嘅嘢。佢只係嚟振興下,或者佢哋覺得好唔自由。所以其實我哋要點樣打造一個比佢哋自由發揮空間,咁我哋嘅第一步一定係要令到企業嘅老細們接納呢件事,咁點樣接納?就係啱啱最務實嘅,最實際,係每一個佢本來就會洗錢嘅地方做到有記憶點。因為一年真係做好多嘢,但係焦點好分散,冇人會有記憶點。