商業二台叱咤 903「你好嘢」《有你最whole》訪問足本重溫 – 下半部

| Employee Engagement(員工敬業度)如何成功令員工Fall In Love with Our Brand?

我們之前都有做過一個我們很喜歡的個案。那次是將一晚的周年晚宴,變成一個10個星期的旅程。

同佢哋傾嘅時候,知道公司都有個方向,想令到大家做到數碼化。希望今年前線的同事對住客戶時,可以令到客戶可以Fall In Love with Our Brand,但件事就非常之抽象。我就將成件事變成一個旅程,在活動的六個星期前,推出了一個內部APP,即是全部同事都可以參與。

以前週年晚宴前,你就會收到一個電郵,請你bookmark日子,save the date,然後去到晚宴兩三日前再提你記得嚟呀,成件事就完了。

究竟呢六個星期會做咩呢?我哋會每兩三日有好多不同的溝通,例如今年為何會有一個APP?我哋今年的主題是什麼?又會同他們講,因為這個主題就需要這種dress code,然後教佢哋著衫、比貼士,重點要着什麼。然後亦都有不同的事去讓他們參與,因為員工亦好希望,有一個機會去表達自己的諗法。可能揀menu這部分,以前你到當日才會知道自己吃什麼。但我哋就讓他們投票揀menu,去投票請誰來表演、誰來做司儀。去到最重要的關鍵抽獎禮物都是比他們自己揀,我們亦都跟投票結果的比例,去買禮物。當然我們都會有好多串連啦,他們一路玩,一路睇我們的貼文,投票的時候,就會一路儲分。當日來到,入場前/開席前都會有些活動,同小遊戲比他們玩。佢哋已經非常清楚自己的目標,要做什麼,要玩什麼,怎樣參與投入,而不是去到就hea等或問仲有幾耐開始。當晚所有活動,我們都會繼續用APP貫穿做不同的東西。去到當晚最後,我哋有個神秘大獎。因為個theme是一個城堡,所以最後個APP入面最高分的,我們會送一個南瓜車去接他回家。我們就book了架Rolls-Royce送個同事返屋企。

其實係呢六個星期入面,我哋聽客戶講,連茶水姐姐都會問你: 你今日睇咗個APP未啊?我投咗票啦!

因為我哋就係想建立到一個Talking Point一個可以比他們溝通的點。因為有好多大企業,或者不同的公司,其實不同部門,唔認識都好正常;因為就算同部門,都未必會識。所以其實佢哋有時就係欠一個話題,一個機會讓他們去講。因為一些好小的事情,已經令到佢哋好開心,我哋其實就是將這些好細的拼圖拼埋一齊。他們都有兩個目標,年頭有講,一個想要數碼化啦,另一個好難明嘅就係要去fall in love with the brand。 數碼化其實想成間公司推向一個世代。但是部份部門做到,好多公司都得;想全部都做到,就有些難度。所以咁樣去推行的時候,亦都想比其他戰略夥伴去感受到,我哋係做得到!其實沒有什麼是直接得過你讓佢去感受。因為能夠做到就顯示成間公司都是同心去做一件事;從來都不是不能,而是不為。他們不肯去做呢件事,因為覺得唔方便。這個數碼化,不見得真係對前線的員工有幾大方便,例如售貨員,或者前邊去跑數的人,他們覺得好煩,好多資訊你講俾我聽就可以。但是反而愈傳統的,對他們來講越方便,所以他們不一定願意去嘗試,但是能夠見到成間公司同心去做一件事,其實都在顯示他們的文化正在建立出來。

為何我們要做六個星期?因為時間就是讓有些人第一個星期他們未開APP的。但是他們會突然之間發現,為何身邊全部的人都講緊同一件事的?他們就會搵返貼文來看啦。原則上就好似早幾年這個Pokemon go,一樣好多人都不是Pokemon的fans,但是見個個都玩,咁不如我都開來玩下啦。

| Employee Engagement(員工敬業度)有沒有做到實質成效?

當然有。因為好多時完咗活動,公司內部都會做返統計,看看大家對於今年有什麼反應,或者回饋。

第一,個回覆率比以前高左三成。而入面亦都有好多不同的評分,當中有兩個都是幾重要的指標,就是問個Event APP的好玩程度,評分有5分,5分入面評4分或以上的人,都有接近九成以上。

而第三樣嘢就是問對於公司,想做到fall in love with the brand。你透過今次的活動,你的理解度有幾多?都是5分為滿分,高過4分的同事都是超過八成以上。即係佢哋都明白,都有啲feel嘅,我覺得呢樣嘢都好緊要。因為我哋一直都有monitor住,最後成個APP的使用率都有過九成五。係差不多接近人人都有用緊。

然後好開心嘅係,完咗活動之後APP是有保留到,又去進化左做2.0,做咗公司一個內部溝通。去到後面一路monitor 的時候,其實都會知道中間,公司一路出不同的溝通,去俾前線的員工睇。特別是鋪頭前線的同事,你要佢哋去check電郵,其實真係好頭痕。對於佢哋來講,返工放工碌電話睇到公司有啲咩資訊,或者個樓上部門,有啲咩人想同他們講,一路去睇個閱讀率、open rate 都是有over 8成人。

對我們來說最容易知道嘅結果首先就是個客會返轉頭,其實這個都是一個認可。同埋我們公司有個好重要的堅持是要每個event都要爭取到客戶的compliment 。因為這是代表着,認同我們的理念,對我們來說是好重要。所以最好的方法就他會返轉頭,同埋管理層會加budget。每間公司本身內部已經有好多不同的方法,去檢視他們員工的狀態。本來就存在,所以其實他們是比我們更清楚,他們的員工有冇加到分。他們有他們的方法去睇到,我們通常都會聯絡。我們通常對待一個客戶,我們就會好容易變成他們公司的員工。

所以剛剛提起,有一個我們好深刻的compliment,其中一句他們是說,覺得Rosy Sky就好似一條extended team ,跟他們站在同一條線,去看怎樣每年進步。

| Rosy sky 如何協助企業達成One Team One Goal?

我們都有試過一個經驗,我們都覺得好好玩。我們好多週年晚宴,都會有同事去咗表演,好多員工表演,來自不同部門。我們果次就幫個客戶,會將所有要表演的同事呢,串埋一齊不分部門,我們將他們全部打散,幫他們做一套分成四幕的音樂劇,填滿原本我們做表演的時間。

其實是好好玩的,中間幫他們排歌、排舞。我們都整咗條making of 。因為件事實在太好玩啦,我們襯他們去排舞,就拍低他們,頭頭尾尾都訪問咗老闆,問為何你又去支持呢件事情發生呢?中間都有同同事去做咗啲訪問,問他們練舞的感受,練完舞即刻去做採訪。整完條making of,再俾返他們睇,真是一個好好的體驗,見到他們好感動,好激動於他們做到呢件事出來。

在這個過程入面,佢都認識咗不同嘅同事,還有佢哋工作以外的一面。平時我們就可能就只係一啲文件上面交接,透過今次才知道,原來你真是好好傾偈的,就不會生外啦。這個個案當中,我們想讓他們感受到,其實公司不是只有工作,其實公司都有生活。呢件事就是俾他們感受到,公司的生活文化,因為好多人一齊。

因為這個不是我們第一次同這間公司去做的活動,前面仲有鋪墊。咁去到呢一個case就是,萌芽以前鋪墊的一啲公司的文化。他們的主題是one team one goal。所以其實成間公司咁大,咁多不同的部門,我們都可以是一條team來的。因為一般來講,一間公司他們會有前線啦。咁大公司來講,其實前線他們有好多不同分店,好多時候就會互相競爭的意欲。即是有時貨係得咁多,咁我買定你買呢?不可以比其他分店做得好過我們。但是公司角度,要比較不應該是要同自己比較,所以其實最初是從呢一個點去出發,去幫他們灌輸。公司最想做到香港、澳門,甚至是大中華區是一個整體,但呢樣野是好難做到,我們去幫他們建立這個文化。

主持:咁我想問,頭先講到其中個活動就係大家一齊做咗個音樂劇出嚟。咁有冇啲員工係唔想,又要排,又要付出好多時間喎?

其實好關鍵嘅係,前面點樣建立呢粒種子。建立左種子之後,後面就係佢哋自願去做一件事。自願同被迫就真係爭好遠。如果係被迫就難以處理。自願就唔同,你出來都會想自己做得好好睇睇。所以個件事我哋係幫佢哋做緊一個專業嘅訓練。到時佢哋出來的時候,會好proud自己能夠做到,一大條team一齊做到,佢哋通常都好感動。我係相信係人都想要有個開心嘅環境工作。都會想又多朋友,多人去傾訴。起碼是共同進退的感覺。本身由冇話題而冷漠,到開始有話題,甚至有一齊做啲嘢,呢一個是經歷是過程。

主持:我想問之前功夫係咪好重要?

咁一定係最多資源,最多時間放係前邊。

主持:怎樣去鋪墊?

所以頭先就有講,前面都是仲有做咗個活動的,就是500個同事,去咗泰國做team building。這次的目標就是想擺粒種子俾全部人,首先會記得One Team One Goal,有左呢粒種子之後,就要個平台去發芽,所以去個周年晚宴,我們去做呢件事的時候,他們就會自願出來,又真係會有一個機會,去比他們體驗到,怎樣一條team一條心去做一件事,然後就做咗一件好爆嘅事。所以精彩是在於後面這個making of。因為中間有返個過程,會採訪他們中間他們排練的時候,事後個刻嘅感動,所以其實是一個好感動的事。

| 將Employee Engagement(員工敬業度)看成社會責任?

我嘅睇法係一個企業存在係社會,必然要有其價值。我好想做有意義的事,時代會淘汰一些相對冇乜價值的公司。而我認為香港需要呢一樣野。因為我是很崇尚外國比較自由的氣氛。我唔係話要一下子去扭轉改變好多嘢,我係純粹想創造、建立到一個可以選擇自由的空間。你可以選擇不自由的,冇問題,但我想創造一個空間比想選擇自由的人。

主持:我好贊成呀!因為香港人真係好鍾意返工,香港人對於工作的責任心係好重。但是為何只是可以去到責任心,而不是真是本身好喜愛一個地方?我好鍾意呢度,所以導致我咁有責任心,而不是自我感覺良好,所以我先至有責任心,其實我返到去是不開心,為何不可以是前者呢?但其實係得嘅。會不會係Steve你有經歷過啲咩,或者你見到有啲例子,其實係可以咁,所以你先至會有咁強烈的信念呢?

我聽到你啱啱講責任一個字呀,我覺得負責任是好重要,但是負責任不是事後負責任,而是事前去負責任。我會predict 有機會咁樣,而去做足相應的措施。因為有事先來補救,其實太遲啦!我個人的睇法,香港文化比較多係事後要你負責,而負責任的定義是要你賠償,總之要你付返啲代價。好似教仔咁,下下懲罰性,我覺得可唔可以調返轉。或者純粹欣賞或者支持就好烏托邦,可不可以將烏托邦拉近少少現實,而變成一個版本,不是只有懲罰。所以其實係我一路生活所接觸,我所見到,就有咁樣嘅感悟係到。

會不會Steve本身係響外國生活過?定係你背景影響,會導致你這個非本地的信念呢?

其實就冇生活過,不過好嚮往。但是我好熱愛這個地方,我好愛香港。而外國得,為何香港又不得呢?咁我後生,就總會有一啲咁樣嘅諗法。咁我都好珍惜,年輕的呢段時間,有呢個諗法,咁會令我的人生有意義同價值。

咁Irene又為何會睬你呢,一齊做一件事呢?究竟Irene係咪都係同你一樣嘅人?定係你重金禮聘佢返嚟?你係咪又好早中咗粒種子落佢到,令到佢覺得呢件事係work嘅,跟住就一齊搞呢間公司?

咁其實我的背景一路都是做開活動的。但我認識Steve之前,都是比較營營役役式的。你叫我做,咁我就會做好這個活動啦,然後就會做得好好咁樣。打一個比喻,就是你要煮碗麵,咁我就會諗點樣去煮麵煮到出神入化。但係就冇諗過為何要食麵?為何不去食飯?定係食其他?

我認識咗Steve之後佢其實經常俾inspiration 我,佢就會成日問我點解?咁我就會發現,原來是我做嘢過程入面,我有好多嘢是冇諗到點解。原來又真是乜都有得解個喎,然後我就會開始思考好多背後的意義。原來我經歷咗咁多年,做咗咁多活動,點解有啲活動,自己會做得好感動呢,甚至乎有啲活動可能真係不收錢,或者係好成本價,貼埋錢去做,都好想做好呢件事,我好開心做到呢樣野。但係又有一啲淨係做完就算,放工。點解會有一個咁樣的差異,原來是我同個個活動中間有冇連繫。佢會刺激左我諗好多呢啲嘢,亦都希望以後落嚟,經自己手產出的每個活動,都可以係咁樣,所以我哋就成立咗呢間公司。

| Employee Engagement為什麼叫員工敬業度?

呢一個字Employee Engagement 真係跟所謂嘅文獻係冇一個好筒一的中文譯法。但係一般是華人的社會,我們中文一般都叫做員工敬業度,或者叫員工投入度。但係投入,又不代表真係會產出一啲野。我可以玩得好開心,每日返嚟玩,同真係工作上生產到一啲野,是不同的。所以我哋最後真係要選擇的時候,我們就選擇咗敬業度。但係你問我哋嘅話,我哋最初都有諗過自己去一個合適啲的中文,去形容呢一樣野,我會形容是係向心力!當你對一個地方好向心,就會一條心想去做好件事。但如果我寫員工向心力,咁就應該冇乜人會明白的。