香港電台第二台「改潮玩代」- 面對新的 Workforce(勞動人口,如千禧年代),企業管理層是否需要轉變管理新思維?

|摘錄對話:

主持:

上一節Irene同Steve分享左一啲提升員工敬業度嘅管理,頭先我記得你哋有講到話我哋有X世代、Y世代、Z世代或者千禧年代嘅員工,咁千禧年代真係一班比較上後生嘅朋友就加入左工作嘅團隊入面。我咁嘅思維係唔同嘅報章都睇到話諗野可能好唔同,喺上一節都講到話佢哋可能會投入多啲嘅時間同心機,總之公司比機會,我就會拼搏、會去衝,咁呢個都可以話係員工對公司嘅投入。咁但係對於你地來講,以而家嘅老闆們,佢哋要去面對新嘅Workforce,咁佢哋思維係咪都要用管理新思維呢?思維上都要啲改變呢?

Steve:

其實如果對於Gen Y同Millennial,依家坊間係比較會多一種「僕人式領導」,咁咩叫「僕人式領導」?

呢個領導嘅哲學其實係講緊領導者(Leader)以身作則將個權力同資源去下放,通常以往嘅管理模式都係集中喺越高層,專注集中喺一小部份人上面,跟住下面就跟Order做野,然後上面就派指令。但好多時候下面嘅人,佢哋想發揮,但係都唔知道點樣可以發揮。

咁呢個「僕人式領導」啟發咗,變相由上面下放返個權力同資源,變相就係同埋大家好似一隊運動團隊,一齊出去打拼咁樣。

主持:

頭先聽到Steve咁講「僕人式領導」,一聽就已經好Get到啦!就係話「我係老闆,Jerry你照做啦!」。

但而家係後生嘅唔受果套,定係社會大環境,其實即係話應該係要一齊共同進退,人類社會嘅習性唔同咗?

Steve:

我諗後生嘅比較著重情感上嘅連繫,因為一間公司嘅企業文化想健康,又同時間有歸屬感,好多時候都有情感上嘅連繫喺度,真係好珍惜呢個機會、好珍惜呢個地方。即係咁樣講,以前嘅世代,因為以前香港嘅機會係你要去爭取,當有機會,你會好珍惜嘅。但而家嘅機會比較多,因為資訊有好多啦、好多唔同嘅渠道,而且行業的競爭,有啲好老牌嘅公司、有啲Start-up、有啲獨角獸,一出嚟就已經好大有好多自由度,好多吸引,好多競爭嘅情況下,一個求職者佢就會有好多選擇,相對上就無咁珍惜架喇。咁點樣令到佢會珍惜呢?通常有多啲情感上嘅連繫,就會比較珍惜嘅。